lunes, 19 de febrero de 2018

VISITA DO IES ILLA DE SAN SIMÓN

O pasado venres tivemos o pracer de recibir a visita do alumnado de 4º ESO do veciño IES Illa de San Simón.


Alumnos e alumnas, acompañados por Noemí, a súa orientadora, e dous profesores, atenderon á explicación da nosa oferta educativa e de actividades xerais no salón de actos, para pasar despois a unha visita guiada polas instalacións do Floriani. Rematamos a xornada coa visita á biblioteca e un pincho de media mañá. 




Esperamos que a visita servira para coñecer un pouco mellor o espírito integrador e aberto que temos no centro e para orientar ao alumnado na toma de decisións futuras cara aos nosos bacharelatos ou ciclos formativos.



COMEZO DO PROA 2018

Co entroido de por medio comezaron as clases do Programa de Reforzo, Orientación e Apoio deste curso no IES. Este programa enmárcase dentro das actuacións dos Contratos-Programa que a Consellería de educación oferta cada ano.

Decidimos nesta ocasión, tras facer unha análise dos grupos e do alumnado co equipo directivo e cos titores e titoras, organizar as clases de apoio das tardes para o alumnado de 1º ESO.

As clases impártense dous días á semana, cunha duración de 2 horas por día. Esta semana podemos dicir que comeza xa a tempo completo. O horario deste curso é o seguinte:

  • Martes e Xoves de 16:50 a 18:50 horas.
Esperamos que o alumnado mellore nas competencias lingúísticas e matemáticas, así como na organización e técnicas de estudo de xeito xeral!

jueves, 15 de febrero de 2018

CHARLA SOBRE RISCOS DE INTERNET - 1º ESO

Hoxe tivemos a última das charlas deste curso sobre Internet e os seus riscos cos grupos de 1º ESO. 

De novo, Mercedes Dabán, Subinspectora da Policía Nacional de Vigo, contou todo tipo de riscos, anécdotas e exemplos do que pode acontecer co mal uso da rede Internet, sobre todo, a través das redes sociais.



Esta vez co alumnado de 1º ESO, moi atentos/as e participativos/as en todo momento. Xurdiron moitas preguntas, algunhas sorpresas e resultou unha xornada moi interesante, que esperamos seguir repetindo o próximo curso no IES.



Non debemos esquecer que este alumnado non ten idade legalmente permitida para ter contas en redes sociais e demais, sendo os proxenitores os responsables últimos dos seus actos nesas plataformas. Por outra banda, sabemos que están nun rango de idade susceptible de sufrir danos por intromisión doutros na súa intimidade, polo que deberían ser especialmente protexidos os seus datos persoais e de imaxe.

Deixámosvos cunha reflexión: na charla preguntouse cantos dos presentes xogaban a un videoxogo online para maiores de 18 anos, e houbo unhas cantas mans levantadas... Xogos con contidos violentos, nos que se pode interactuar por chat con persoas decoñecidas e nos que hai que confirmar ser maior de idade.

miércoles, 14 de febrero de 2018

ENTROIDO 2018

Como sabemos, os últimos estudos en neurociencia afrman que sen emoción non hai aprendizaxe. Técnicas como o traballo por proxectos e cooperativo, xunto con motivación e certo grao de creatividade, axúdannos a acadar esa aprendizaxe significativa.

De todo iso houbo no Floriani neste mes previo ao entroido. O tema: Bollywood. 

Un trociño da cultura india: películas, libros, comida, a súa espiritualidade, e todo o que engloba este milenario e rico país, tiveron presencia no IES durante estes días. 




Como colofón, o venres 9 de febreiro celebramos o Entroido con actuacións, premios aos mellores disfraces, e non faltou unha coreografía típica bollywoodiense...



NAMASTE 🙏

CHARLA DA UNIVERSIDADE DE VIGO

O pasado xoves, 8 de febreiro, tivemos no Floriani, dentro das actividades do Programa de Orientación Académica e Profesional do IES, unha charla impartida por Ricardo Corderí, Xefe do Servizo de Extensión Universitaria da UVIGO, para o alumnado de Bacharelato, onde coñecimos de primeira man os graos que se imparten nos 3 campus da universidade (Vigo, Pontevedra e Ourense), as posibilidades do estudo de idiomas, de estudar unha parte da carreira noutras cidades ou países a través de distintos programas, as bolsas de axudas para o estudo, etc.


Ricardo lembrounos a importancia das decisións que se toman na etapa de bacharelato para o futuro do alumnado, e aconsellounos "ser egoístas" nesas decisións, non decidindo segundo o fagan amizades ou incluso por vocacións familiares e non propias.




lunes, 5 de febrero de 2018

PROBAS DE ACCESO A CICLOS FORMATIVOS DE FP

A Consellería de Educación publicou o borrador da Orde do 22 de xaneiro de 2018 pola que se convocan as probas de acceso a ciclos de grao medio e grao superior para este curso.

Para o acceso ás probas de Grao Medio as persoas solicitantes deben ter 17 anos ou cumprilos neste ano. Para o acceso ás probas de Grao Superior as persoas solicitantes deberán ter 19 anos cumpridos ou cumprilos neste ano.

PRAZOS DE PRESENTACIÓN DE SOLICITUDES:

- Acceso a grao superior: do 8 ao 23 de febreiro.
- Acceso a grao medio: do 12 ao 23 de marzo.

DATAS DAS PROBAS:

- Acceso a grao superior: 19 de abril.
- Acceso a grao medio: 31 de maio.

+ info.


miércoles, 31 de enero de 2018

SAÍDA DE FP BÁSICA Á PROXECCIÓN DE "VIDA", EN VIGO

Hoxe mércores, tivemos a sorte de acudir co alumnado de FP básica de Electricidade e electrónica e Administrativo e os seus titores/as á proxección do documental "Vida, máis ca vida" e a posterior curtametraxe "Vida", do director e actor galego Rubén Riós.


A actividade tivo lugar no auditorio Afundación de Vigo, e foi o propio director quen explicou, moi intimamente, como xurdiu este proxecto e porque o levou a cabo deste xeito.


Na curtametraxe participan actrices e actores recoñecidos por todos, así como xente anónima, con diversas discapacidades. O documental previo recolle o proceso de selección das persoas que participan, as súas ilusións, os seus medos e a forma en que superaron con éxito as súas dificultades.

Ao final das proxeccións, a presenza dos protagonistas da obra foi fantástica, así como o diálogo que se produciu co público, moi cercano e emocionado.






OBRADOIRO DE PREVENCIÓN DE DROGODEPENDENCIAS- REXURDIR

Neste mes de xaneiro comezaron no IES os obradorios sobre Prevención de drogodependencias, que imparte a Asociación Rexurdir de Marín e se desenvolverán ao longo deste 2º trimestre. 

Nas horas de titoría da ESO e FP básica, contaremos con algunhas sesións desenvolvidas polas educadoras da asociación, onde se tratarán temas como: habilidades sociais básicas, empatía, asertividade, actividades alternativas ao consumo de substancias prexudiciais, etc.

Grazas a Verónica e Patricia, responsables do programa, e aos titores e titoras pola súa colaboración.




"O SON DO AR" NO DÍA DA PAZ

Compartimos unha das interpretacións musicais do noso alumnado, da que disfrutamos onte polo día da paz do Floriani.


martes, 30 de enero de 2018

DÍA DA PAZ. GRAZAS MEDIADORES/AS!

Lara, Lucía, Michele, Laura, Joel, David, Pablo, Sergio, Raquel, Manuel, Irene e Javier.

Moitas grazas aos alumnos e alumnas do noso equipo de mediación, sempre dispostos a colaborar e traballar na mellora da convivencia!



DÍA ESCOLAR DA NON-VIOLENCIA E A PAZ

Hoxe, 30 de xaneiro, celébrase o Día internacional da non-violencia e da paz. 

No Pedro Floriani conmemoramos este día dando protagonismo durante a xornada ao Equipo de mediación do instituto. Houbo un "stand" de mediación, onde alumnos e alumnas podían recibir información acerca do seu funcionamento a través dos propios mediadores/as.






Ademais, ás 12:00 horas, entre as dúas representacións musicais que organizou o profesor de música, Álvaro, os nosos mediadores máis veteranos leeron unhas frases pola paz e a tolerancia no patio.






Grazas a todos e todas por participar!!!

domingo, 28 de enero de 2018

A RIQUEZA DA DIVERSIDADE

Interesante artigo da sección educativa do xornal "El País" acerca da riqueza que aporta a diversidade de capacidades na educación formal.

Parece complexo, e pouco adecuado incluso, que os alumnos/as que teñen boas capacidades, e saben aplicalas, teñan que convivir na aula con outros alumnos e alumnas con máis dificultades, máis lentos ou, pola contra, demasiado activos. Sen embargo, ser conscientes das dificultades dos demais, e tratar de que as diferenzas se comprendan e acepten, fai aos nenos e nenas máis tolerantes.

Imaxe: Wes Anderson Collection

"Tal vez a los niños se les olvide la historia o las naturales, pero los aprendizajes derivados de una convivencia normal con otros niños con necesidades diferentes, seguro que son aprendizajes que perduran a lo largo de sus vidas".

Podedes ler o artigo completo premendo aquí.

PROBAS PARA A OBTENCIÓN DO TÍTULO DE BACHAREL

A Resolución do 9 de xaneiro de 2018, da Dirección Xeral de Educación, Formación Profesional e Innovación Educativa, convoca a proba para a obtención do título de bacharel para maiores de vinte anos e dita instrucións para á súa realización.

O prazo de presentación das solicitudes será entre o 23 de febreiro e o 9 de marzo de 2018A proba realizarase o día 20 de abril de 2018 en sesións de mañá e tarde no IES San Clemente de Santiago de Compostela.

Para máis información preme aquí.

PROBAS PARA A OBTENCIÓN DO TÍTULO DE GRADUADO EN ESO

A Consellería de Educación ven de publicar a Resolución do 9 de xaneiro de 2018, da Dirección Xeral de Educación, Formación Profesional e Innovación Educativa, pola que se convocan as probas para a obtención do título de graduado en educación secundaria obrigatoria para maiores de dezaoito anos nas convocatorias de maio e setembro, e se ditan instrucións para a súa realización.

Os prazos de matrícula serán:

  • Convocatoria de maio: 12 ao 23 de marzo de 2018, ambos os dous incluídos.
  • Convocatoria de setembro: 2 ao 9 de xullo de 2018, ambos os dous incluídos.
Para máis información preme aquí.

martes, 23 de enero de 2018

FORMACIÓN SOBRE URXENCIAS SANITARIAS PARA FAMILIAS

A Consellería de Educación ofrece ás familias a posibilidade de asistir a unha formación de 9 horas sobre atención a urxencias sanitarias, que será impartida por persoal do 061.

Esta formación desenvolverase no CFR de Vigo (Camiño do Chouzo nº 2, edificio do IME) os días 19 e 26 de febreiro, e 5 de marzo en horario de 16:30 a 19:30.

Para facer a inscrición hai que chamar ao teléfono do CFR de Vigo (986202370) ata o día 9 de febreiro. A selección dos participantes farase por orde de recepción das solicitudes ata cubrir 20 prazas.


martes, 16 de enero de 2018

FP E EMPREGABILIDADE

A Voz de Galicia publica hoxe un interesante artigo sobre as taxas de emprego na nosa comunidade en relación coas titulacións de Formación Profesional coas que contamos no sistema educativo. Os datos expostos xurden da enquisa bianual que elabora a Consellería de Educación.

Os datos son chamativos, si ben é certo que temos que ter en conta a temporalidade deses contratos dos que se fala no artigo, sobe todo, nos sectores máis demandados, como son o da construción e o sector servizos, con Hostelería e turismo á cabeza.

A familia de Administración e xestión, impartida no IES Pedro Floriani, é na que máis rápido atopan traballo os titulados/as e unha das que conta con maior presenza de mulleres.

Na táboa preséntanse as titulacións máis ou menos demandadas segundo diversos factores.


Fonte: Voz de Galicia

ENTROIDO 2018

Algo se está a cocer no Floriani...


lunes, 15 de enero de 2018

ACREDITACIÓN DE COMPETENCIAS 2018

A Consellería de Educación publicou a Orde do 29 de decembro de 2017, pola que se convoca o proceso de acreditación de competencias profesionais adquiridas a través da experiencia laboral, na Comunidade Autónoma de Galicia. A través desta, as persoas interesadas poderán solicitar participar no proceso de acreditación de competencias do seguinte xeito:
  • A solicitude de participación deberá presentarse en soporte papel na secretaría do centro (sede) onde se vaia desenvolver o procedemento e farase empregando a aplicación informática subministrada pola Consellería de Cultura, Educación e Ordenación Universitaria, que se atopa no enderezo http://www.edu.xunta.es/acreditacion. Esta aplicación estará activa a partir do 10 de xaneiro de 2018. 
  • A solicitude, logo de ser cuberta e xerada pola aplicación, deberase imprimir para ser entregada no Centro Integrado de Formación Profesional (sede) onde se vaia desenvolver o procedemento. 
  • Os datos relacionados coa documentación xustificativa do historial profesional e/ou formativo e dos requisitos de participación no procedemento deberán cargarse na devandita aplicación informática. 
  • O prazo de presentación de solicitudes será desde o 10 de xaneiro ata o 2 de febreiro de 2018.